Со гордост ви соопштуваме дека нашето училиште е единственото во државата кое ја стекна престижната ознака СТЕМ Експерт училиште во рамки на меѓународните СТЕМ ознаки за квалитет (STEM School Label). Ова признание ја потврдува нашата посветеност на иновативното образование, поттикнување на креативноста и развој на вештини кои ги подготвуваат учениците за предизвиците на 21 век.
СТЕМ ознаката за квалитет е меѓународен симбол за извонредност во наставата по природни науки, технологија, инженерство и математика. Како Експерт училиште, ја демонстриравме нашата способност да:
- Создаваме инклузивна СТЕМ средина каде секој ученик има шанса да успее.
- Спроведуваме современи наставни методологии кои поттикнуваат истражување, иновации и критичко размислување.
- Соработуваме со локалната и глобалната заедница за унапредување на СТЕМ образованието.
- Имаме јасна СТЕМ стратегија, која имплементира интердисциплинарни, иновативни пристапи во СТЕМ наставата, креирајќи интерактивни средини за учење кои го поттикнуваат интересот и мотивацијата на учениците, развивајќи ги кај нив вештините за живот во 21от век.
Ова признание е резултат на заедничката работа на нашите ученици, наставници и родители. Сите заедно придонесуваме за создавање на училишна средина каде се негува љубопитноста и се развиваат талентите.
Продолжуваме да се стремиме кон уште поголеми успеси, подготвени да бидеме лидер во образованието и инспирација за другите училишта.
