Rеализирани активности во рамки на Европската недела на кодирањето – EU Code Week 2026
По повод одбележувањето на Европската недела на кодирањето – EU Code Week 2026, во ООУ „Крсте Мисирков“, Скопје, беа реализирани едукативни активности насочени кон развивање на дигиталните компетенции, алгоритамското размислување, креативноста и одговорното користење на современите технологии.
Учениците активно учествуваа во различни активности преку кои имаа можност да истражуваат, создаваат, програмираат и решаваат проблеми, применувајќи ги своите знаења и вештини во практични ситуации.
Креирање дигитални постери со помош на генеративна вештачка интелигенција
Во рамките на оваа активност учениците од VIII одделение ги истражуваа можностите на генеративната вештачка интелигенција преку креирање дигитални постери на теми поврзани со безбедноста на интернет, сајбербезбедноста и одговорното користење на технологијата.
Учениците учеа како да формулираат и подобруваат инструкции (промптови) за генерирање слики и визуелни содржини. Тие ги анализираа и критички ги оценуваа генерираните резултати, ги препознаваа нивните ограничувања и ги комбинираа со сопствени креативни идеи.
Преку изработката и презентацијата на постерите учениците ја развиваа својата креативност, критичко размислување и свесност за етичко и одговорно користење на вештачката интелигенција, истовремено согледувајќи ја важноста на човечката креативност и донесувањето одлуки при користење на ВИ-алатки.
Креирање едукативни игри за сајбербезбедност во Scratch
Учениците од VII одделение имаа улога на дизајнери и креатори на интерактивни едукативни игри во програмската околина Scratch, со цел подигнување на свеста за сајбербезбедноста и безбедното однесување на интернет.
Работејќи индивидуално и тимски, учениците истражуваа теми како креирање силни лозинки, препознавање фишинг-пораки, заштита на личните податоци и препознавање потенцијални интернет-закани.
Тие осмислуваа сценарија, креираа ликови и предизвици и применуваа програмски концепти како редослед на инструкции, циклуси, услови и настани. Преку процесот на програмирање, тестирање и подобрување на игрите, учениците ги развиваа алгоритамското размислување, креативноста, соработката и вештините за решавање проблеми.
Создадените игри претставуваат едукативни ресурси преку кои учениците можат да им помогнат на своите соученици да стекнат знаења за побезбедно користење на интернет.
Учење преку игра – креирање и решавање интерактивни квизови
Во рамките на оваа активност учениците имаа можност да ја преземат улогата на креатори на интерактивни едукативни квизови, користејќи ги знаењата стекнати од претходно изучуваните наставни содржини по информатика.
Учениците самостојно или во тимови осмислуваа прашања, формулираа понудени одговори и креираа интерактивни квизови преку кои на креативен и забавен начин го проверуваа и утврдуваа своето знаење. По изработката, квизовите заеднички ги играа, одговараа на прашањата и дискутираа за точните решенија.
Преку оваа активност учениците не беа само учесници во процесот на учење, туку и активни креатори на дигитални образовни содржини. Активноста придонесе за развивање на дигиталните компетенции, критичкото размислување, креативноста, соработката и комуникациските вештини, истовремено поттикнувајќи ја мотивацијата за учење преку игра.
Развивање алгоритамско размислување преку Дабар предизвици
Третата активност беше посветена на развивање на алгоритамското и логичкото размислување преку решавање задачи од меѓународниот предизвик по информатика и компјутерско размислување – Дабар (Bebras).
Учениците решаваа интересни логички задачи и проблемски ситуации кои бараа анализа, препознавање обрасци, примена на различни стратегии и донесување логички заклучоци.
Преку индивидуална и групна работа, учениците дискутираа за можните решенија, ги споредуваа своите пристапи и ги образложуваа постапките што ги користеле.
Активноста придонесе учениците да разберат дека информатиката не се однесува само на програмирање, туку и на развивање креативно и критичко размислување, соработка и пронаоѓање ефикасни решенија за различни проблеми.
Реализираните активности во рамките на EU Code Week 2026 придонесоа за создавање мотивирачка и интерактивна средина за учење, во која учениците имаа можност да бидат активни истражувачи, креатори и решавачи на проблеми.
Преку поврзување на програмирањето, генеративната вештачка интелигенција, алгоритамското размислување и сајбербезбедноста, учениците стекнаа знаења и вештини значајни за нивното понатамошно образование и одговорно учество во дигиталното општество.
Активностите ја потврдија важноста на практичното, креативното и истражувачкото учење како пристап за поттикнување на интересот на учениците за информатиката и современите дигитални технологии.















Поврзани содржини